حوار .. علاء الدين ظاهر
من الأدوار المهمة في أي متحف التواصل مع مختلف فئات الزوار وخاصة الأطفال،وهنا تتأكد لنا أهمية الأقسام التعليمية في متاحف الآثار،كونها التي تتعامل مع أهم فئات الزوار وهم الأطفال وتلاميذ المدارس،وهو ما كان سبباً لتكون ثاني حوارات #نون_النسوة عن النماذج النسائية الناجحة في الآثار،مع د هبة حسن عامر رئيسة القسم التعليمي بمتحف الإسكندرية القومي.
ولأن فكرة الحوارات إنسانية في المقام الأول،فقد جاءت ردود د.هبة علي الأسئلة متسقة مع شخصيتها المرحة والبسيطة،خاصة أن دورها هو التواصل مع الزوار وخاصة الأطفال من خلال الأنشطة التعليمية،وهو دور يتطلب أسلوب معاملة ابعد ما يكون عن الجمود،لذلك تركنا الاجابات كما هي..إلي الحوار.
1 .. كيف بدأتِ رحلتكِ في مجال الآثار؟ وما اللحظة التي أدركتِ فيها أنّ هذا هو طريقك؟
بدات تحديدا في ٢٠١١ كنت بشتغل في دار الاوبرا بعد تخرجي من الاثار، وبعد كدة اشتغلت في الوزارة في مجال دراستي. الحقيقة اكتر حاحة خلتني حاسة اني حبيت المجال هو أنه متواصل مع المجتمع مش مجرد مكان لعرض القطع الأثرية، لا ده ساحة للتعليم والتعلم.
2 .. هل واجهتِ اعتراضات أو تحديات في بداية دخولك لمجال يُنظر إليه كعمل شاق؟
العمل الأثري مش شاق خالص لو حبيته، أي شغل في الدنيا محتاج مجهود سواء ذهني أو بدني، بس الشغل لو بتعمله بحب مش حتحس بالمجهود.
3 .. مين أكتر شخص كان له تأثير في دعم مسيرتك الأثرية؟
لحد دلوقتي مفيش 😆
4 .. تعرضتِ لمواقف صعبة في الشغل بسبب كونك امرأة؟ وكيف تعاملتِ معاها؟
الحقيقة لا، المجتمع المصري اتغير جدا في التعامل مع فكرة ان الست بتشتغل وبتحتك بالمجتمع،بس عندي مواقف كوميدية،لأن أحيانا انا بشتغل في وسط الأطفال وبعمل مسرح عرائس.
ففي مرة مدير مدرسة داخل يشوف عرض لمدرسته في المتحف افتكرني طالبة ثانوي وطردني من وسط الاطفال علشان اروح اقف مع زمايلي الثانوي الي برة القاعة😂
5 .. ما أكثر تحدي واجهكِ في موقعك الحالي؟
الامكانيات علشان اقدر اعمل كل الافكار الي بتمناها، وكمان القيود الكثيرة.
6 .. كيف ترين فكرة أن المرأة لا يناسبها العمل في المواقع الأثرية الميدانية؟
بالعكس الموضوع شيق أكتر وفيه تحدي
7 .. شايفة إن تمكين السيدات في مجال الآثار وصل لفين؟ وإيه اللي لسه ناقص؟
أنا شايفة ما شاء الله قيادات كثيرة نسوية، على قدر من العلم والمهنية.
8 .. إيه أهم إنجاز بتفخري به خلال مسيرتك؟
الحقيقة ان اي حاجة بحققها حتى لو صغيرة بعتبرها انجاز، بس اكتر حاحة تحديدا بحبها هو أني نشرت كتابين باسمي.
9 .. لو رجع الزمن، هل كنتِ هتختاري نفس الطريق؟
اعتقد اه كنت حختار نفس المجال
10 .. موقف أو اكتشاف أو مشروع أثري غيّر نظرتك للمجال أو أثبت لكِ إنكِ على الطريق الصح؟
الاطفال الي بيدخلوا المتحف وبيتعلموا وبيكبروا ويرجعوا نفس المكان تاني ولسة فاكرين الي اتعلموه، ده انجاز حقيقي بيعيش.
11 .. كيف تتعاملين مع فريق عمل مختلط؟ وهل أسلوبك القيادي تأثر بكونك امرأة؟
أحيانا أه، الحقيقة التعامل مع كل فئة محتاج مرونة يعني لو انا اصغر سنا من الزملاء الي أنا رئيستهم حيبقى التعامل مختلف عن أننا لو في سن واحد،ولو فريق العمل سيدات او سيدات ورجال لان احيانا فكرة انك ترأس انسان لازم يشعر براحة وسلاسة في التعامل.
12 .. من واقع تجربتك.. إيه أهم مهارات القائد الناجح في المؤسسات الأثرية؟
الذكاء في ادارة المسئوليات واعطاء كل شخص في الفريق دور وعدم تهميش أي فرد. التقدير المعنوي مهم جدا.
13 .. هل تشعرين إن المناصب القيادية أصبحت أكثر انفتاحًا أمام السيدات؟
جدا، نحن قادمات بقوة ☺️
14 .. ليه لحد الآن بعض الناس مستغربة وجود سيدات في مواقع أثرية صعبة؟
يمكن علشان الميديا بتصدر اكتر وجود الرجال في المواقع الاثرية.
15 .. إزاي ممكن نغير الصورة النمطية عن المرأة المصرية العاملة في قطاع الآثار؟
نتكلم عنه زي ما حضرتك بتعمل
16 .. نصيحتك للبنات اللي نفسهم يدخلوا كلية آثار أو يشتغلوا في القطاع ده؟
طوروا من نفسكم، واتعلموا ولو فشلتم في طريق في ألف طريق تاني.
17 .. لو قدامك فرصة تغيّري شيء واحد في منظومة العمل الأثري… تختاري إيه؟
الروتين
18 .. ما أحلامكِ للمستقبل سواء في مسيرتك المهنية أو للآثار عمومًا؟
الحقيقة نفسي أعمل بودكاست عن التاريخ، ومحضرة كل الادوات بس كسولة شوية.
19 .. أقرب قطعة أثرية لقلبك؟ وليه؟ وأول موقع أثري اشتغلتي فيه وعمرك ما تنسيه؟
انا اشتغلت من بدايتي في متحف الاسكندرية القومي ومازلت، أكثر قطعة كنت بحبها حاليا في المتحف اليوناني،كانت فسيفساء الميدوزا وكانت القطعة الرئيسية الي بشرحها للأطفال.
20 .. لو مش آثار.. كنتِ هتشتغلي إيه؟
أنا مطربة بدار الاوبرا المصرية من عشرين سنة، ولو مكنتش بقيت اثرية كنت حركز أكتر في الفن، بس انا استغليت الفن وعملت فريق كورال ومسرح في متحفي، وقدمت مسرحيات حضرتك كتبت عنها قبل كدة، زي أخناتون ونفرتيتي.
ليست هناك تعليقات:
إرسال تعليق