حوار .. علاء الدين ظاهر
تمتلك روحا مقاتلة وفي نفس الوقت لا تفارق الضحكة وجهها.. شعلة نشاط في عملها الذي تمارسه بحب فعلاً رغم ما به من صعاب وتحديات،كما أنها عاشقة للنادي الأهلي وعضوة بارزة هناك ونشيطة جداً في عمل فعاليات وعي أثري بين أعضاء النادي.
إنها نشوى أبو زيد المشرفة على أعمال الترميم الدقيق بالمواقع الأثرية وإدارة البعثات والتنمية الثقافية بالإدارة العامة للقاهرة التاريخية،والتي تعد من الكفاءات البشرية المتميزة في ترميم الآثار،ولذلك استحقت أن تكون واحدة من سيدات نون النسوة.
1 .. كيف بدأت رحلتك في مجال الآثار؟ وما اللحظة التي أدركت فيها أن هذا هو طريقك؟
بدأت عندما كنت في الصف الأول الإعدادي، وكنت في رحلة لجامع أحمد بن طولون ووجدت عدد من المرممين فوق السقاله وسألتهم ماذا تفعلون قالوا بنصلح المسجد علشان لما تيجى تشوفيه في أحسن حال ومن هنا بدأت في البحث عن كليه الآثار وبقت حلم
2 .. هل واجهت اعتراضات، أو تحديات في بداية دخولك المجال كما ينظر إليه كعمل شاق؟
أه طبعا والدي كان رافض وكان حابب إني أدخل كلية التجارة إنجلش، علشان أشتغل في مجال التجارة أسهل
3 .. مين، أكتر شخص كان له تأثير في دعم مسيرتك الأثرية؟
بابا بردوا لانه اقتنع وكان مؤمن بقدراتى وإمكانياتى
4 .. تعرضت لمواقف صعبة في الشغل بسبب كونك امرأة، وكيف تعاملت معها؟
آه طبعا تعرضت للتقليل من قوتى وقدرتي على تحمل المسؤولية، إلى أن ربنا أكرمني بعد وقت قصير وأصبحت من متخذي القرار ومسؤولة عن كل خطوة بداخل الأثر، وهو السبب في تغيير نظرة زملائي في العمل والاعتماد عليا
5 .. ما أكتر تحدي واجهك في مواقعك الحالي؟
لقد واجهت العديد من المشاكل في ترميم بيت زينب خاتون، ومنها الأرضية الرخامية والمدفأة حقيقي من أصعب المشاريع اللي اشتغلت وأشرفت عليها
6 .. كيف ترين فكرة أن المرأة لا يناسبها العمل في المواقع الأثرية الميدانية؟
أنا مؤمنة جدا إن كل إنسان سواء رجل أو امرأة جواه طاقة وإمكانيات، يعني ممكن جدا. رجل، لا يستطيع العمل بداخل الموقع الأثرية الميدانية.
وبالعكس المرأة غزت كل سوء العمل بكل قوة، وأثبتت جدارة و نجاح .. والآثار بالذات تحتاج إلى عناية دقيقة، وصبر في التعامل وأعتقد. مفيش أكثر من صبر، واهتمام المرأة بأدق التفاصيل.😉
7 .. شايفة، إن تمكين السيدات في مجال الآثار وصل لفين وإيه اللي لسه ناقص؟
إحنا واصلين لنص الحلم.. السيدات يحتجن إلى الاعتماد عليهم بشكل أكبر وبثقه تامه في قدراتهم وامكانيتهم لإدارة اي ملف يخص عملهم بالاثار وهناك نماذج يحتذي بها داخل وزارتنا
8 .. أي أهم إنجاز بتفتخري به خلال مسيرتك؟
كل موقع، وكل مشروع ترميم أشتغلت، في هو فخر. ليا ولما بعدي بجانب اي اثر منهم بحس ابنى وبكون فخورة جدا بنفسي وبصلابه ابنى اللي قاوم كل تعديات الزمن عليه
9 .. لو رجع الزمن، هل كنتي هتختاري نفس الطريق؟
مش عاوز أجاوب إجابة نموذجية ومثالية للأسف. بتيجي علي لحظات، بحس أني كان لازم أغير المجال .. ودا نظرا للصعوبات اللي بنقابلها، خصوصا المرتبات الرعاية الطبية، ومشاكل كثير بتخلي الإنسان، يفكر أنه كان يقدر يكون في وضع أحسن من كده .. لكن لو السؤال على العمل، بمهنة الآثار. معتقدش، إني هلاقي نفسي في مكان بحبه. زي ترميم الأثار
10 .. موقف أو اكتشاف أو مشروع أثري غير نظرتك للمجال، أو أثبت لك إنك على الطريق الصح؟
كنت إشراف على قبة قنصوة ابو سعيد اللي موجودة علي طريق صلاح سالم ...قبل الترميم كل الناس قالت هيهدوها هي عامله عائق في الطريق خصوصا انه كان في انشاء كباري وطرق وكان في ازاله للقرفات
وفي اللحظة دى قولت لو ده حصل انا هسيب الشغلانه دى ولم أكن أعلم انها ستكون من نصيبي وجاء قرار اشرافي عليها وكنت ببص عليها انها حته من قلبي واقفه صامده يبنوا كباري يبنوا طرق يهدوا الدنيا لكن القبه واقفه شامخه في وش اي حد ..محدش يقدر يمشيها ولا يجى عليها وعرفت ان الدوله ماشيه علي خطى ثابته في الحفاظ علي الاثار والاهتمام به
11 .. كيف تتعاملين مع فريق عمل مختلط؟ وهل أسلوبك القيادي تأثر بكونك امرأة؟
الاحترام فرض وليس تفضل وهو ما يفرض عليا وعلي الجميع ..ولا أقبل التعامل معى بأى من تخطى الحدود وبيكون في خطوط عريضه واضحه في التعامل سواء مع امرأة مثلي او رجل ..وضع القوانين والضوابط هي أساس نجاح اي منظومه ..اسلوبي القيادى في العمل جعل منى زوجه تعرف واجبتها وتدرك ما يقابله زوجها لتوفير لقمه العيش ..عملي خلق جوايا تحمل مسؤولية تجاه بناتى وبقيت بزرع فيهم الاعتماد على النفس والصلابه لمواجهة المجتمع وسوق العمل وللتعود علي تحقيق الأهداف دون استسلام
12 .. من واقع تجربتك، ايه أهم مهارات القائد الناجح في المؤسسات الأثرية؟
هو من يحتك بأرض الواقع ..هو من يخرج بره بلورته الزجاجية ويلمس كل حاجه ويقابل كل التحديات ويبحث عن اسباب المشاكل وطرق حلها
13 .. هل تشعرين أن المناصب القيادية أصبحت أكثر انفتاحا أمام السيدات؟
أعتقد آه، السيدات بقوا موجودين وفرصهم زادت في الفترة دى
14 .. ليه لحد الآن، بعض الناس مستغربة وجود سيدات في مواقع أثرية صعبة؟
بمنتهى البساطة لأنه عمل شاق أنا بشتغل كمرممه أثار من أكثر من 23 سنة، وحقيقي الموضوع متعب جدا لأن مجهود ذهني مع مجهود بدني جربت تقف فوق سقاله من ٨ صباحا لحد ٥ مساءا بتصلح وترمم سقف بكل تفاصيله وتعديات الزمن عليه ويكون ليك رؤيه وصبر وخوف علي الحاجه حقيقي صعب جدا علشان كده الناس بتستغرب استمرار ووجود سيدات بالعمل بالمواقع
15 .. ازاي ممكن، نغير الصورة النمطية عن المرأة المصرية العاملة في قطاع الآثار؟
أنا مقتنعة، إن كل إنسان لازم يشتغل على نفسه علشان ما يفضلش واقف في نفس المكان التطور ومجاراة العلم وتثقيل المهارات وعمل دورات لتطوير الذات من أهم الأشياء اللي لازم نشتغل كلنا عليها
16 .. نصيحتك للبنات اللي نفسهم يدخلوا كلية آثار أو يشتغلوا في القطاع ده؟
كلامي هيكون صريح لو البنت معندهاش قوة وحلم وهدف للتطوير النفس والذات والعمل علي تخطى العقبات في سوق العمل
17 .. لو قدامك فرصه تغيري شئ واحد في منظومه العمل الاثرى تختارى ايه؟
الاستعانة بكوادر الشباب اكتر من كده
18 .. ما أحلامك للمستقبل سواء في مسيرتك المهنيه أو للاثار عموماً؟
حلمى الف العالم كله واشتغل في كل قطعه اثر من كل دوله ..عارفه انه حلم بعيد بس مؤمنة ان هيجي وقت ويتحقق
19 .. أقرب قطعه اثريه لقلبك وليه ..واول موقع اثري اشتغلتى فيه وعمرك ما تنسيه؟
أقرب قطعه كسوة الكعبة التي كانت موجودة في متحف النسيج بشارع المعز..اول موقع كان قصر الأمير طاز..من اقرب واحب المشاريع لقلبي
20 .. لو مش آثار كنت هتشتغلي ايه؟
مذيعة أو صحفية.
ليست هناك تعليقات:
إرسال تعليق